Igrexa de San Miguel de Enquerentes

Parroquia: Enquerentes (San Miguel)
Lugar: As Quintás

A igrexa parroquial presenta planta rectangular e está construída en cachotaría. Os seus muros laterais, revocados e pintados de branco, contrastan coa fachada, que mantén un acabado en pedra natural. A espadana actual (campanario) é de construción recente.

San Miguel Arcanxo, patrón da parroquia, é un dos tres arcanxos mencionados na Biblia xunto con Gabriel e Rafael. É considerado defensor da fe, protector da Igrexa, guía das almas e guerreiro contra o mal. A súa festa litúrxica celébrase o 29 de setembro, xunto con San Gabriel e San Rafael. Adoita representarse con armadura de soldado, espada ou lanza na man, pisando ao demo e, ás veces, cunha balanza que simboliza xustiza. É patrón de policías, soldados, bombeiros e de quen afronta perigos.

En fronte da igrexa atópase un cruceiro. A visita pódese completar cun percorrido polo Hórreo de Outeiro, o miradoiro do Coto de San Sebastián ou a área recreativa de Brandelos, entre outros lugares de interese.