Igrexia de San Fiz De Quión

Igrexia de San Fiz De Quión

Parroquia: Quión (San Fiz)

Lugar: San Fiz – 15824 Touro

O barroco é sen dúbida o estilo artístico predominante na arquitectura relixiosa do municipio de Touro, do mesmo xeito que en boa parte das igrexas rurais galegas.

O século XVIII en Galicia caracterizouse por un forte incremento demográfico. A pesar de períodos de fame negra e epidemias, este crecemento poboacional foi posible grazas á ampliación dos terreos cultivados e á crecente introdución de novos cultivos, como o millo e a pataca, procedentes de América.

A arquitectura barroca galega viviu o seu maior esplendor durante o século XVIII, coincidindo cunha época de poderío económico do estamento eclesiástico. Deste xeito, a Iglesia, posuidora da maior parte da riqueza de Galicia, financiaba a maioría de reformas ou construción de novos templos, que seguiron o estilo arquitectónico predominante no momento.

A Igrexa parroquial de San Fiz de Quión data desa mesma época. Construída a base de cachotería e cantería, trátase dun templo de estilo barroco con planta de cruz latina cuberta por unha bóveda de canón.

O cruceiro caracterízase polas dimensións dos seus grandes piares, arcos torales de medio punto e bóveda de aresta. Tamén chama a atención o presbiterio, con arcos formeros destacados e bóveda de aresta decorada con pinturas ao amorne.

Sobre o corpo do campanario, con pilastras en esquina lisas e cornixa e fornelo octogonal, elévase o cupulín, rematado nun pináculo.

No exterior, ademais do campo de celebración das festas patronais, consérvase un cruceiro de granito coas imaxes de Cristo crucificado no anverso e San Agustín no reverso.

Trátase dun recurso patrimonial fácil de visitar grazas á boa sinalización e ás posibilidades de aparcamento, nos arredores e no campo de festas situado enfronte.