Petróglifo de Pena Furada
Parroquia: Circes (Santa Mariña)
Dende o ano 1953 temos referencias documentais deste petróglifo grazas ó arqueólogo Ramón Sobrino Lorenzo-Ruza. Aínda que é certo de que ata o ano 2017 non foi “redescuberto” e foi grazas a axuda dalgúns veciños xunto con membros do colectivo A Rula e coa colaboración do Concello de Touro.
Este petróglifo que data da etapa final do Neolítico e da Idade do Bronce está situado no Monte de Pena Furada, sendo o primeiro petróglifo prehistórico documentado en Touro ata a data, aínda que polo topónimo do lugar, a poboación local xa coñecía a súa existencia pero non o seu valor arqueolóxico.
Os gravados rupestres distribúense por toda a superficie dunha roca de laxa de aproximadamente 2 metros de longo por 1 metro de ancho, situada case ao nivel do chan. Os motivos decorativos principais son máis de 40 ocos ou pequenas covas e cazoletas con formas redondeadas e ovaladas e unha cruz. A cruz gravada posiblemente sexa de orixe medieval ou moderna.
As dimensións dos gravados oscilan entre 2 e 12 cm de diámetro e a súa profundidade, entre 1 e 3 cm. As covas do centro son máis anchas e de maiores dimensións que as dos extremos e algunhas delas están unidas por un suco.
